SAKAPUR SEUREUH TINU NYUSUN
Kitab Bayanutasdiq ieu ngarupikeun salah sahiji kitab anu diserat ku KH.Syihabudin Suhro Wardi (Ajengan Citungku), salaku salah saurang murid ti Syekh Ahmad Shohibul Wafa Tajul Arifin (Abah Anom) anu jadi Mursyid Thoriqot Qodiriyah Naqsyabandiyah Pondok Pesantren Suryalaya.
Kitab ieu rengse diserat dina kaping 23 Sya'ban 1395 Hijriyah - 13 Agustus 1975 Masehi.
Dina ieu kitab diterangkeun Mabade Anu Sapuluh anu ngarupakeun Dadasar jeung Tujuan dina hiji Pan, sahingga bisa dikanyahokeun definisina, diparantikeunana, tujuannana, kautamaanana, dalilna, asal-usulna, ngaranna, dasarna, hukumna jeung bahasannana eta pan.
Kumargi kitab Bayanutasdiq ieu khusus nerangkeun perihal tarekat, mangka dina ieu kitab diperjelas yen elmu tarekat teh pikeun nganyahokeun kana pertingkahna nafsu anu dipuji jeung anu dicela ceuk syara' sarta cara-cara pikeun ngabersihkeunana, oge kumaha cara mapaesanana pikeun ngahontal ma'rifat anu dipikarido ku Alloh swt.
Oge dina ieu kitab diterangkeun pertelaanana anu dimaksud dina syare'at, tarekat jeung hakekat, sahingga bisa memperjelas yen Thoriqot Sufiyah ngarupakeun hiji alat anu pangpentingna dina islam pikeun ngajalankeun peribadatan ka Pangeran atas dasar ajaran Rosululloh saw.
Malah dina ieu kitab ge nerangkeun fasekna jalma anu ninggalkeun tarekat dina peribadatanana, seperti oge zindiqna jalma anu make tarekat tapi ninggalkeun syare'at.
Dijelaskeun oge, yen sacara lahir tarekat teh elmu syare'at jeung sacara batin tarekat teh elmu hakekat, sahingga sampurna eta tarekat ngalaksanakeun naon anu parantos diajarkeun ku Rosululloh saw sarta nyonto ka anjeuna.
Diterangkeun yen tarekat teh kudu dimimitian ku be'at ka salah saurang Mursyid pikeun nundung tina teuasna hate sarta ngiparatan pirang-pirang dosa kalawan ngalaksanakeun riyadloh pikeun ngalatih diri sahingga teu katungkulkeun ku nafsu tina warna anu kotor.
Anu ngarang ieu kitab nandeskeun yen sacara hukum dina islam, lebet kana tarekat teh fardhu 'aen, hartina wajib kacida berdasarkeun pirang-pirang dalil tina Qur'an, Hadits sarta Fatwa para Ulama anu kakoncara kasholehanana.
Malah dina ieu kitab nerangkeun ancaman nurutkeun hukum islam pikeun jalma anu anti kana tarekat paehna su-ul khotimah, lantaran geus nganafikeun hiji perkara anu pangpokona dina islam, nyaeta elingna hate dzikir ka Allah dina satiap tingkah laku dina agamana.
Oge diterangkeun meunang ingkar kana tarekat asal geus nyagara dina nganyahokeun mu'jijat, karomat, martabat kawalian, tabahur dina tafsir, hadits, furu'iyah, elmu lughot, tata bahasa arab, majaz, isti'aroh, ushul fiqh, aqo'id, elmu ma'rifat, elmu alam ghoib, elmu asror jeung sajabana ti eta, sahingga dianjurkeun dina ieu kitab, sakira-kira teu acan tabahur (nyagara) dina elmu-elmu anu tadi, ulah rek wani-wani ngewa, anti sarta nyalahkeun kana thoriqot sufiyah, lantaran matak kufur ka Alloh tina ngaingkarkeun sabahagian parentahan Pangeran.
Diterangkeun dina ieu kitab, yen inti dina tarekat teh dzikir ka Allah, kumargi sagala rupi anu henteu ngangge dzikir boh dina anggahota badana, lisana jeung hatena, mangka eta pagaweananana teh teu bisa wushul ka Allah, sarta dzikirna kudu saba'dana digurukeun heula sakumaha anu parantos dicontoan ku Kanjeng Nabi saw dina nalqinan sarta ngabe'at para sahabatna anu parantos kawarid tina pirang-pirang riwayat.
Dina ieu kitab ge diterangkeun pertingkahna dzikir sacara jahar jeung khofi, oge diterangkeun elmu latho'if pikeun marantikeuna eta dzikir dina pirang-pirang lathifah.
Ieu kitab dipungkas ku nerangkeun adegan dina tarekat, sahingga para pengamal tarekat tiasa ngadegkeun tarekat sakumaha mistina.
Mugia ku ayana ieu kitab bisa jadi washilah lungsurna Hidayah sarta Rohmaniyah Allah kangge anu nyerat, anu maca, anu nguping, sarta anu nyebarkeunana ieu kitab kalayan idzin Allah swt.
Ieu kitab diserat ulang ku
Ust. Asep Mulyana
Ar-Rapuhani
di Garut sarta diblogkeun ku penyusun.
Garut, 8 Desember 2010
Penyusun
Abdul Ghoets
